日本用「外國勢力」衝擊世盃！日本足協前日宣布新一期「藍武士」世盃外圍賽23人名單，徵召咗喺歐聯大放異彩嘅南野拓實，以至中島翔哉、久保建英等20名外流球員，日職搵食嘅土炮只得3件，係日本起用外流國腳最多嘅一次。
淺野拓磨重新上榜
同9月嘅人選相比，今次日本前鋒線變化較大，效力德甲雲達不來梅嘅大迫勇也因為大髀傷患，需要休戰4至6個禮拜而落選，北海道札幌岡薩多嘅鈴木武藏亦冇份，反而淺野拓磨及鎌田大地就重新入圍。分組賽首戰作客兩球淨勝緬甸嘅日本，嚟緊本月10日先喺主場出戰蒙古，15日就作客杜尚別對塔吉克。