棄用高圖爾斯即轉運
今晚西甲10點場爆發榜首大戰，「1哥」皇馬主場迎戰「2哥」CF格蘭納達。雖然皇馬近況麻麻，但主帥施丹終於的起心肝棄用紙紮門神泰拔高圖爾斯，有助鞏固防守，今仗撞正「私房菜」CF格蘭納達必定擦餐飽，直取讓球主勝。
（Now 632周六晚10時直播）
儘管皇馬依家排緊聯賽第1，兼且係唯一未敗之師，不過7戰只得4勝3和，未見霸氣，亦與死敵巴塞隆拿頻頻甩轆有關。特別係門將泰拔高圖爾斯嘅表現堅曳，呢位上年世盃金手套得主，自上「艦」後43場把關，總共失咗59粒，場均失1.37球，只得12仗保持清白之身，日前歐聯對布魯日初段又失2粒，激到主帥施丹半場就換走佢，下半場即連追2球打和收場，明顯換走瘟神果然有運行，何況有傳高圖爾斯因傷未復操，預計會續用艾路拿把關，效果更佳。
講開對布魯日場波，皇馬如此劣勢下咁都搶番1分，賽後施丹都話眾將上下半場嘅比賽態度明顯唔同晒，佢哋更加投入同專注，隊長沙治奧拉莫斯都話下半場嗰隊，先係真正嘅「銀河艦隊」，可見佢哋踢番起鬥志。
CF格蘭納達訪巴拿貝多慘敗
CF格蘭納達今季異軍突起，近5仗聯賽取得4勝1和殺上「2哥」位，但主力費迪維高、基尼等未好番，陣容不整。加上佢哋堅係皇馬「私房菜」，近6次碰頭皇馬唔單止贏晒，其中4次至少贏4粒，包括2次造訪巴拿貝遭血洗0比5同1比9，真係未踢已經腳仔軟，格食格下捧番讓球主勝。