周日凌晨意甲下游對決，熱拿亞主場惡鬥AC米蘭。AC近期表現下滑，尤其後防大出血，嚴重影響整體表現，加上熱拿亞防線同樣欠穩，兩軍鬥失波，呢場入球騷實走唔甩，大盤值得捧場。
（MyTV Gold 301台、Now 638、有線614及654台周日凌晨2時45分直播）
雙方防線都欠穩
AC米蘭今季為重振旗鼓，揾嚟前森多利亞主帥甘柏路執教，仲主動放棄歐霸資格，可惜隊波表現並未因此獲得提升，計埋上仗1比3不敵費倫天拿，AC已經連續3場聯賽吞下敗仗，喺積分榜跌落下半版，新帥甘柏路注重防守嘅踢法明顯冇料到，仲形成反效果，近3仗失7球，呢場主力中堅梅沙基奧要坐波監，「紅黑兵團」後防隨時再有甩漏。好彩前場拉菲爾利亞奧表現對辦，上仗靠個人能力為球隊破蛋，搭住呢場倒戈面對舊主嘅波蘭射手比亞迪克，AC攻力有保證。
熱拿亞近期走勢低迷，近4場聯賽未贏過之餘，上仗仲淨吞拉素4蛋，呢場急需一場勝仗重振球隊士氣。踢法開放嘅熱拿亞今季6仗聯賽，有5次開3球或以上，既然後防欠穩，呢場不妨放手一博專注進攻，兩軍為搶分隨時大打出手，入球大值博。