法甲頭場演榜首戰，聯賽榜1哥巴黎聖日耳門（PSG）主場迎戰2哥昂熱。PSG傷兵已陸續康復，而且經過季初適應期，一眾新兵亦逐漸融入球隊，相信嚟緊PSG表現只會愈嚟愈好；昂熱今季遇強即屈，一旦失守防線隨時大崩潰，PSG讓兩球、兩球半照捧上盤。
（myTV Gold 302、Now 639、Now 714、有線655、615、603及604台周六晚11時30分直播）
相比上季頭14輪聯賽全勝，PSG今季踢咗8輪已經輸咗2場，表現的確冇咁霸氣，不過摒除佢哋聯賽輸畀雷恩及蘭斯，其實聯賽連盃賽其餘9場全勝，包括喺歐聯以3比0大勝皇家馬德里，最重要係早前受傷嘅一對箭頭基利安麥巴比、卡雲尼已經傷愈，前者上場聯賽對波爾多後備上陣，仲即刻交出助攻畀尼馬一箭定江山；另外，今季來投喺阿根廷射手莫路伊卡迪喺周中歐聯亦射入加盟後首個入波，協助球隊作客1比0擊敗加拉塔沙雷，相信入波會陸續有來。
捧埋中位數3.5球大盤
昂熱排聯賽榜第2位，成績遠超預期，不過今季5場勝仗對手除波爾多之外，其餘4隊都係榜下游球隊，而且佢哋作客里昂曾經大敗0比6，作客上屆亞軍里爾亦全失3分，擺明欺善怕惡，對住狀態冒升嘅PSG隨時被攻到慌，PSG讓兩球、兩球半盤口雖然係辣啲，不過某程度上亦反映到莊家對主隊大炒嘅信心，如果保險啲可以捧埋中位數3.5球嘅大盤。