贏即出線小將爭功
2020歐國盃外圍賽A組上演榜首大戰，「1哥」英格蘭作客鬥「2哥」捷克。4戰全勝嘅英格蘭今場只要贏波便可取得決賽周入場券，目前英格蘭人才過剩，球員有機會落場都要搏盡爭取表現，佢哋今屆4場分組賽贏波都喺上半場領先，由頭贏到尾，今場客W只得1.45倍冇肉食，讓一球、球半又略嫌太多，建議捧1.95倍半場客勝。（有線602及662台周六凌晨2時45分直播）
英格蘭今屆歐國外已經先後對過同組其餘4支對手，結果4場皆以2球差距贏波，實力明顯大超班，依家佢哋4戰得12分排第1，領先多踢1場嘅捷克3分，由於同分先計對賽成績，只要英格蘭今場贏波，捷克得番2場比賽已經肯定超越唔到英格蘭，「三獅兵團」可以穩奪頭2名直接出線。
英格蘭近年新星湧現，除咗一直保持穩定入球率嘅哈利卡尼及史達寧，過去一年查頓辛祖、迪格蘭賴斯及阿歷山大阿諾特亦先後掘起，今季喺英超掀起「青春風暴」嘅車路士今次更有4名球員入選，包括首獲徵召嘅前鋒譚美阿巴謙及中堅湯姆利，反而去年協助英軍殺入世盃4強嘅主力，包括迪利阿里及艾歷迪亞因為狀態不足被棄用，證明目前「三獅兵團」爭位情況激烈，球員落場定必施展渾身解數爭取表現。
捷克青黃不接難睇好
捷克對上3屆歐國盃有2次分組賽出局，2006世盃後亦已連續3屆缺席決賽周，明顯處於青黃不接期；捷克首循環作客英軍大敗0比5，就算主場出擊亦唔值得睇好，不過考慮到英格蘭一對正選中堅哈利馬古尼及米克堅尼，今季喺球會表現唔算穩陣，加上英軍上輪對科索沃後防亦失咗3球，今次作客讓一球、球半有風險，既然英格蘭4場分組賽贏波都喺上半場早早領先，今場轉捧1.95倍半場客勝仲抵玩。