今晚另一場重頭戲係H組法國作客鬥冰島。現排小組第2嘅法國正遭受土耳其、冰島前後夾擊，為保前2不容有失；冰島出線形勢告急，主場出擊亦須搶攻求3分，雙方近5次交鋒總入球全開3球或以上，捧2.5球大盤最穩陣。（有線603及604台周六凌晨2時45分直播）
法國雖然貴為應屆世盃冠軍，不過喺今屆歐國外成績未算一面倒，踢咗6場分組賽5勝1負，暫與土耳其同得15分、因對賽成績不及對手排第2，而且法國只比冰島多3分，如果今場輸波就會被冰島追至同分，唔可以放軟手腳。上輪國際賽養傷缺陣嘅前鋒基利安麥巴比及中場尼高路簡迪已傷愈歸隊，中前場入球能力唔需要擔心，不過隊長門將洛里斯上周末喺聯賽受重傷，加上烏姆迪迪、拿樸迪兩大中堅因傷倦勤，後防充滿隱憂；睇番法國今屆歐國外鬥摩爾多瓦、阿爾巴尼亞等弱旅都有失波，對冰島再失一啲都唔奇。
近5交手總入球至少4粒
冰島目前3分落後土耳其及法國排第3，爭入頭2名出線仍未絕望，由於冰島餘下賽程仲要作客土耳其，今場鬥法國有主場之利更加要搏盡，唔可以主守。冰島近年鬥法國雖然輸多贏少，不過近5次交手只有1次食白果，其餘4次喺法國身上一共射入8球，5場全部至少有4球交收，今場隨時再演入球騷。