傷兵多兼有歐國外後顧
今晚重量級熱身賽，德國喺多蒙特嘅西法倫主場對阿根廷。德國以往喺世盃恰死宿敵，但熱身賽對賽就掉轉，何況德軍嚟緊周日晚會喺歐國盃外圍賽作客愛沙尼亞，相反阿根廷冇大賽任務，大可去盡啲，受讓半一黑柴推介下盤。
（香港開電視77台、有線662及602台周四凌晨2時45分直播）
德國目前喺歐國外C組領放，但只係同次席嘅北愛爾蘭同分，及領先少踢一場嘅荷蘭3分，現階段冇失分空間，而且德國傷兵太多，原有嘅長長傷兵名單包括利萊辛尼、魯迪格、哥列斯卡、達斯拿、尼高舒侯斯、泰路基拿同奇雲查普繼續缺陣外，另3名主力卻奧斯、馬菲亞斯真達同祖拿斯赫達都喺最近一輪聯賽受傷齊申請免役，搞到主帥勒夫周日匆匆致電史浩克04中場蘇奧沙達，同利華古遜中場拿迪安阿美利，首次補選佢哋入伍，成為勒夫帶領德軍所選用過嘅第101同102位球員，加上曾入選但未上過陣嘅哈化柏林中堅歷卡斯史達克同弗賴堡前鋒禾特舒密特，呢幾位球員好有機會喺今晚首披國家隊戰衣。
阿根廷二線兵更猛
阿根廷3大王牌美斯、阿古路同迪馬利亞繼續冇入選，PSG箭頭莫路伊卡迪亦唔喺陣中，不過用二線兵反而有驚喜，上月曾喺主場大炒墨西哥4蛋，效力國米嘅拿達路馬天尼斯連中三元，呢位22歲箭頭近兩仗對巴塞同祖記都有波入，狀態弗爆又有拚勁，隨時比美斯或阿古路更有作為。
德國近屆世盃決賽周恰死阿根廷，2006年8強賽和1比1射贏12碼，之後一屆又係8強碰頭大勝4比0，到2014年兩軍爭冠，90分鐘互無紀錄，德國加時憑馬里奧葛斯絕殺捧盃。或者因為世盃受盡屈辱，阿根廷近年熱身賽對德國特別落力，唔計2005年嘅洲際盃（賽和2比2），阿根廷近5次熱身賽對德國獲4勝1和，當中4次仲係德國主場，可見今晚德軍讓波靠唔住。