Ｃ朗搵戴伊做新目標

葡萄牙周六凌晨將會喺歐國外B組主場迎戰盧森堡（有線605台周六凌晨2時45分直播）。頭號球星C朗（圖）勢必再度擔正，呢位效力祖雲達斯嘅「入球機器」，上仗為葡萄牙披甲面對立陶宛食出大四喜，國家隊累積入球數升到93球，早已經成為國家隊入最多波嘅歐洲球員，嚟緊仲希望打破由伊朗傳奇前鋒阿里戴伊，所保持嘅109球最多國家隊入球紀錄。