今晚日聯盃4強首回合賽事，大阪飛腳主場迎戰北海道札幌岡薩多。飛腳近況回勇，日前就喺聯賽大炒岡薩多5蛋，心理上佔盡優勢，而且今屆於主場出戰日聯盃特醒，夠晒料藉地利搶先機，主勝有計。
（有線661及601台周三晚6時直播）
岡薩多防線慌失失
雖然飛腳嘅聯賽排名唔及岡薩多，但自從7月底提升U23教頭宮本恒靖掌舵後，飛腳近11場獲3勝4和4負，表現回穩，其中啱啱先喺聯賽主場迎戰今仗對手岡薩多，最終大炒5比0，信心爆棚，從德國回流嘅前鋒宇佐美貴史亦打破入球荒，重拾射門鞋。
岡薩多近期狀態唔多掂，近4場僅得2和2負，除啱啱提到慘吞飛腳5蛋外，亦曾喺主場以1比3輸畀弱旅仙台維加泰。佢哋打法過於進取，導致球隊近19場只得1場無失球，防線堅唔穩陣。除此之外，陣中主力如門將具聖潤、「泰國美斯」猜拿迪普桑格辛，都要為國家隊踢「太公波」而缺陣，實力受削。
何況飛腳喺今屆日聯盃主場表現突出，近5戰取得4勝，連聯賽「2哥」FC東京造訪此地都要輸波而回，主場威力唔講得笑，必趁地利搶先機，主勝捧得過。