澳職開波喇！
新一季澳職今日下晝正式開打，揭幕戰即上演冠軍級對決，由上屆澳足盃冠軍阿德萊德聯，主場硬撼上季澳職季後賽盟主FC悉尼。FC悉尼雖然保留原班人馬，兼簽入射手巴巴路西斯，但似乎仍需磨合，何況「阿聯」近年於聯賽首戰特醒，主場出擊仲有得受讓咁筍，讓球主勝不容錯過。
FC悉尼上季常規賽做「2哥」，並喺季後賽連挫墨爾本勝利及珀斯光輝奪冠，後勁凌厲。呢隊波今夏有前荷蘭國腳施安迪莊離隊，但佢上季經常受傷，預料影響唔大，餘下大部分主力都留隊，包括上季常規賽連季後賽共轟18粒嘅射手方祖，簽入埋上季射入15球嘅墨爾本勝利前鋒巴巴路西斯，以及曾效力拜仁同史浩克04嘅中場鮑祖漢，令戰力得以保持。
FC悉尼未操起讓波危
之不過，FC悉尼新舊球員仍未夾熟，除咗近期熱身賽表現一般外，早前澳足盃32強亦被布里斯班獅吼踢出局，成班波似乎仲未入局。
阿德萊德聯近年打盃賽特別醒，上屆澳足盃以2比1擊敗FC悉尼封王，今屆亦見關過關，自8月開始，連挫墨爾本騎士、奧林匹克FC、紐卡素噴射機及中岸水手，長驅直進殺入決賽，將於10月尾同墨爾本城爭冠，亦藉澳足盃極速操起狀態。
上季常規賽排第4嘅「阿聯」，雖有兩大主力奇治葛雲及史葛加路維離隊，好彩有前鋒艾希臣托利趁機上位，呢位剛從二隊提升的小將，喺早前4場澳足盃轟入4球，並有賀路雲及新加盟嘅拉利麥基爾後上支援，不容小覷。加上「阿聯」近7季聯賽首戰3勝4和未輸過，包括上季首輪主場打和FC悉尼1比1等往績支持，今場受讓必捧讓球主勝。