西流添強援
周六下午澳職首輪大戰，西悉尼流浪者主場鬥中岸水手。上季表現失望嘅西流，今季重整旗鼓引入多位實力派德甲兵，首戰喺新建成嘅主場出擊，唔想失威自然落多幾成力，睇好佢哋旗開得勝，主勝值博。
美亞派文舒維加屈機
西流上季戰績令人失望，最終只獲常規賽第8無緣季後賽，獲球會留任嘅德國主帥巴布為帶領隊波重回正軌，今季即刻搵嚟幾位強援助陣，除咗有過往喺德甲打滾多年嘅瑞士中場派文舒維加之外，最令球迷期待嘅莫過於前法蘭克福當家前鋒美亞，呢位36歲老將曾斬獲93個德甲入波，級數絕對比啱啱離隊嘅西班牙前鋒奧利奧爾尼亞拿高幾班，有望改善西流前場進攻質素。
中岸水手近年淪為澳職魚腩，計埋上季最終積分榜墊底，近4季常規賽有3次都包尾，戰力成疑。翻查往績，西流近5次面對中岸水手獲4勝，包括上季2次主場贏波，呢場西流喺新建嘅主場首次踢聯賽，肯定唔想失禮，主勝好路。