嚟緊國際賽期，各大聯賽都要讓路，今晚只得英錦標分組賽玩吓，但都難唔到阿King，其中最有心水嗰場南部B組賽事，牛津聯主場對衞冕嘅樸茨茅夫。樸茅雖然聯賽排名不及牛津聯，但每逢出戰英錦標表現特醒，撞正牛軍傷兵滿營，有力反客為主，客勝有計。
（周三凌晨2時45分開賽）
先講講兩軍喺南部B組形勢，牛津聯首輪以2比1反勝諾域治U21，樸茅更加係兩戰全勝排第1，佢哋同屬英甲分子，牛津聯位列第9，遠高於中下游嘅樸茅，不過現時有占美漢臣、拿柏、佐治科奧尼、丹東尼科迪等養傷，陣容不整。另一邊廂，樸茅近2仗聯賽贏晒，總算走出早前3場不勝嘅低谷，何況該隊乃上屆英錦標盟主，出戰呢項賽事分外落力，連同今屆兩連勝在內，樸茅近10場英錦標，於法定時間豪取9勝1和佳績，非常認真冇hea踢，客勝值得捧場。
串葉士域治勝新特蘭讓球勝
至於同一時間開波嘅兩場波，南部A組葉士域治主場對基寧咸，葉士域治前鋒佐敦羅拔士及阿曼度杜巴喺聯賽冇乜上陣機會，必趁英錦標爭取表現，在首輪以2比1反勝熱刺U21，正係阿曼度杜巴兩番助攻畀佐敦羅拔士入波，加上近4次對基寧咸贏3次，主勝穩開。最後係北部A組新特蘭主場對甘士比，英甲「6哥」新特蘭有艾登麥基迪及米克麥紐迪傷愈復出，攻力進一步提升，相反乙組仔甘士比有前鋒麥斯胡禮受傷上陣成疑，此消彼長下，今屆喺英錦標首度亮相嘅「黑貓」可輕取對手，直取讓球主勝。