今晚賽事唔多，阿King一樣搵到好嘢推介，重心英甲獨腳戲保頓主場對黑池。保頓沉淪榜尾之餘，仲未解決財困問題，士氣低落，黑池必定趁機打落水狗，客勝有計。
（周二凌晨3時開賽）
曾經係英超巨人殺手，以往有奧高查、安歷卡、佐卡夫、中田英壽等名將效力過嘅保頓，唔經唔覺已經降班7年，依家仲沉淪英甲，令人不勝唏噓，加上財困問題，未開咧就畀賽會先扣12分，好彩8月有「白武士」Football Ventures （White） Limited出手相助，先逃過破產厄運。不過新老闆仍然拖欠球員人工，正所謂「三軍未動，糧草先行」，查實前前後後，保頓球員已被拖糧達5個月，仲邊有心機同你賣命呀？難怪近7仗聯賽，保頓只得2和5負劣績，見到都唔開胃。相反，黑池位居英甲前列，而且近3仗聯賽取得2勝1和，擺脫早前5場聯賽不勝低潮，造訪軍心大亂嘅保頓，仲唔趁機踩多兩腳咩，客勝好路。
奧連斯半和好路
至於法乙奧連斯主場對朗斯，雖然朗斯聯賽3連勝弗爆，不過奧連斯近5仗聯賽亦只係輸過1場，而且全部都開半場和，初段防守異常集中，何況守將古柏今仗要坐波監，一定會先鞏固防守，半場和值得再追。最後係葡聯盃A組賽事，布拉加作客甲組仔彭拿費爾，彭軍前鋒佐治皮利斯近期大跌Watt，相反布拉加射手保連奴費南迪斯近3仗入3粒，有力反客為主，客勝捧得過。