澳職一路擴充版圖，今季會增加一隊西部聯（West United）至11隊，下季聯賽再會有Macarthur FC加入。新軍西部聯位於墨爾本西部，將會用兩個唔同球場作為主場，陣中最矚目球員必然係「澳職戰神」貝利沙（圖）。
經驗老將貝利沙孭飛
西部聯波衫以綠同黑為主，靈感嚟自西部叢林嘅顏色，主場係綠黑間條，作客波衫係白底綠色同黑色碎花設計。將會穿起呢件新波衫嘅，包括征戰澳職多年嘅科索沃前鋒貝利沙。貝利沙曾經協助布里斯班獅吼同墨爾本勝利取得常規賽同季後賽冠軍，經驗夠晒豐富。34歲嘅貝利沙上年加盟廣島三箭，但不受重用，決定重返澳職。
貝利沙嘅進攻拍檔將會係意大利中場迪亞文迪，呢名36歲浪人足迹遍及歐亞，曾經效力韋斯咸、博洛尼亞、廣州恒大、巴勒莫等，左腳出色嘅迪亞文迪可司職左翼或「假9」位置，但隨住年紀漸老，慢慢趨向校炮。