鞏固防線唔畀北愛偷雞
2020歐洲國家盃外圍賽重燃戰火，周五凌晨有場C組重頭戲，荷蘭主場迎戰「2哥」北愛爾蘭。荷蘭牌面雖然高過北愛，不過佢哋後防失波多，嚟到關鍵時刻未必會過分搶攻；北愛向來擅守不擅攻，加上今場和波對佢哋冇壞，相信會沿用以往以慢打快戰術同荷蘭周旋，首選半場和。
（有線602及662台周五凌晨2時45分直播）
改善先失波漏洞
目前C組形勢，北愛與榜首德國同得12分，因對賽成績較差而屈居次席，荷蘭則打少1場、落後3分，若果今場取勝，便會形成3隊同分局面。由於荷蘭已經完成主、客兩循環鬥德國嘅比賽，相反北愛除咗今場之外，餘下兩輪分別要喺主場再鬥荷蘭、然後煞科戰作客德國，場場都咁惡啃，如果荷蘭今場贏波，出線前景將更加樂觀。
「橙衣兵團」今次點兵精銳盡出，利物浦孖寶華基爾雲迪積克及韋拿杜姆、巴塞隆拿中場法蘭基迪莊、里昂老牌翼鋒迪比及前鋒賴恩巴布等悉數入選，不過荷蘭防守不穩問題仍未解決，連同歐國聯在內，荷蘭近5場共失7球，只有1場冇失波，其餘4場更加係先失守一方，嚟到重要關頭「6分波」，相信主帥朗奴高文亦唔會太過急於進攻，以免防線出現太多空位，畀對手有機可乘。
北愛再打拉布戰
頭先講過北愛嚟緊場場硬仗，既然佢哋目前領先荷蘭3分，今場和波都冇壞。北愛班底大部分係英超二線兵、英冠及蘇超等球員，質素雖比荷蘭差一截，不過主帥米高奧尼爾以守為主嘅整體戰術，足以令唔少球隊吃盡苦頭。北愛今屆歐國外5戰取得4勝1負，只失4球，尤其比賽初段特別擅於玩拉布戰，5場有4次開半場和，包括上場主場鬥德國，今次作客鬥同級球隊荷蘭勢必照辦煮碗，捧半場和最上算。