今晚歐國外E組焦點戰，當然係斯洛伐克主場迎戰威爾斯。「紅龍」過於倚賴加里夫巴利數胡，佢一旦被凍結即刻死晒火，今屆歐國外入得4粒咁大把，造訪回勇嘅「2哥」斯洛伐克，凶多吉少，斯軍讓平半，上盤捧得過。
（有線604及603台周五凌晨2時45分直播）
威爾斯喺上屆歐國盃決賽周殺入4強，可惜之後無以為繼，包括今屆4場歐國外只得2勝2負，目前只排第4，落後榜首克羅地亞4分。事實上，威爾斯過於倚賴加里夫巴利數胡嘅情況未有改善，但呢位皇馬球星狀態飄忽，只要盯死佢，「紅龍」進攻就會冇晒火。雖然今次重召中場艾朗藍斯，但佢好番冇耐狀態一般，而季初堅搶鏡嘅曼聯翼鋒丹尼爾占士，近期愈踢愈沉，威爾斯喺今屆4場歐國外入得4球，攻力都幾疲弱。
克羅地亞夠炒匈牙利
斯洛伐克喺今屆歐國外5戰獲3勝2負，雖然上次對「紅龍」輸0比1，但之後表現復甦，連熱身賽在內，近4場取得3勝1負狂轟12球，為保「2哥」位及報番一箭之仇，戰意唔使懷疑，上盤抵捧。
同組嘅前列大戰，克羅地亞主場對匈牙利，「格仔兵團」雖有守將馬迪積米祖域因傷退隊，但今次有傷愈嘅拿傑迪錫歸隊，拍住隊長莫迪歷中場贏晒，相反匈牙利有後衞巴拉夫今仗要坐波監，加上客場一向唔掂，此消彼長下，預計克羅地亞應可贏到呢場關鍵戰，直取讓球主勝。
（有線661及601台周五凌晨2時45分直播）