隊長哈利仔鬧爆懶散
今晚歐國外A組關鍵戰，榜首英格蘭作客保加利亞。「三獅兵團」上仗意外輸波，被破近10年外圍賽不敗金身，哈利卡尼都話球員衰在太懶，連隊長都罕有地開口鬧人，佢哋仲唔識做咩，撞正包尾嘅保加利亞，一定搶韁博反彈，加上喺今屆歐國外經常於初段領先，半場客勝值得捧場。
（有線661及601台周二凌晨2時45分直播）
今屆歐國外頭4仗贏晒、順風順水嘅英格蘭，上仗喺早段領先下，竟爆冷以1比2反輸畀捷克，令佢哋10年來喺歐國盃及世盃嘅外圍賽不敗之身被打破，認真冇面。不但英國傳媒要佢哋「認清現實」，唔好以為自己已重返頂級勁旅行列，連隊長哈利卡尼亦忍唔住鬧爆，批評全隊踢得太懶散，冇晒平時嘅快速傳送，仲特登提醒隊友喺歐洲每次作客都唔易打，若果唔肯付出百分百，隨時又陰溝裡翻船，連同上仗反勝為敗，球員吸取教訓後唔敢再輕敵。
保加利亞曳到冇朋友
保加利亞雖有名宿巴拉哥夫執教，可惜愈踢愈沉，就算加入雲達臣同馬些連奴2名入籍兵亦未見起色，今屆頭6場歐國外只得3和3負，若計晒各項賽事，佢哋近10仗未贏過，曳到冇朋友，依家喺A組仲排緊包尾，戰意成疑。雖然上仗輸波後，令打少1場嘅英格蘭被捷克追到同分，只領先同樣打咗5場嘅科索沃4分，但只要今仗贏波，出線機會依然好大，何況今屆5場歐國外，有4次於上半場取得領先優勢，最終均由頭贏到尾，預計造訪弱旅保加利亞會一開波即嚟料，半場客勝有買趁早。