復仇戰勢搶出線權
H組榜首大戰法國主場迎戰土耳其，「高盧雄雞」6月作客曾經以0比2不敵土耳其，今場復仇味濃，而且今場贏波全取3分後，就肯定取得決賽周入場券。法國今屆歐國盃外圍賽主場表現出色，3場全部贏3球或以上，而且過往都食住土耳其，喺主場球迷大力支持下，必定可以痛宰土耳其，法國讓一球、球半，照捧上盤。
（香港開電視77台、有線602及662周二凌晨2時45分直播）
法國同土耳其同時係7戰6勝1負得18分，由於同分計對賽成績，土耳其暫居榜首，排第3嘅冰島有12分，小組賽只淨番3輪，即使佢哋贏晒亦只得21分，但冰島對賽成績輸晒畀法土兩軍，所以今場邊隊全取3分，就可以進身決賽周。
「高盧雄雞」防中尼高路簡迪上場熱身時受傷缺陣，領隊迪甘斯表示，經檢查後冇大家想像中咁大鑊，但今場係咪正選上陣，都要最後階段先決定。不過，雖然法國缺少幾名主力，但上場仍然可以作客贏波，相反，土耳其冇重大傷病問題，但上場主場只能以1比0小勝阿爾巴尼亞，今場作客面對「高盧雄雞」相信會捱打。
土耳其近3征法全敗
土耳其近3次作客法國全輸，相反法國喺歐國外主場表現勇猛，3場均大炒對手，而且全部贏3球或以上，相信喺主場球迷打氣之下，可以復仇兼攞得歐國盃決賽周入場券，撐法國上盤。