C朗衝700球大關
今晚歐國外B組同樣爆發榜首大戰，「1哥」烏克蘭主場硬撼「2哥」葡萄牙。烏克蘭依家lead住5分，今仗唔輸即出線，難免打守勢波，反而益晒急於搶分嘅葡萄牙，何況葡軍王牌C朗近3仗為國披甲轟6粒，今仗再有入波即達到職業生涯700球大關，一定搏甩髀，客勝有計。
（有線604及603台周二凌晨2時45分直播）
烏克蘭近年由名宿舒夫真高執教後，戰績穩步上揚，不過前鋒出身嘅「軍刀」帶領嘅「黃藍軍」反以防守見稱，今屆6場歐國外取得5勝1和未輸過之餘，更只失1粒，依家領先葡萄牙5分，今仗只要唔輸，便鎖定出線資格，為免有乜差池，一定會踢得穩打穩紮，但過於縮後亦非好事，變相令葡萄牙更容易控制戰局。
葡萄牙現時領先第3位嘅塞爾維亞4分，想保住前2嘅出線席位，今仗不能鬆懈。好彩佢哋王牌C朗狀態大勇，上仗贏盧森堡3比0又有進帳，近3仗為國效力狂轟6粒，亦令佢職業生涯累積699球，唔單止距離歷史紀錄嘅伊朗傳奇球星戴伊嘅109個國家隊入球又再近一啲，而且只差1粒便達到700球大關，佢咁要威梗係唔會揸流攤喇。翻查紀錄，連上屆在內，葡萄牙近6場歐國外作客贏晒，呢支衞冕之師為殺入決賽周必定搏盡，客勝捧得過。