一周雙賽捧完對家撐番佢
歐洲國家盃外圍賽C組榜首雙雄分途出師，暫列次名嘅德國作客對榜尾愛沙尼亞，基於呢組3強荷蘭、德國同北愛爾蘭同積12分，德國喺對賽成績輸咗畀荷蘭，為確保前兩名出線資格，今場冇失分空間，好在佢哋今年一周雙賽表現例牌第2場好過第1場，黑柴上周三晚捧完德國對家，今晚德國強陣遇弱就要撐番佢，「讓球主客和」德國讓到3球，都照捧讓球客勝。
（有線603及604台周一凌晨2時45分直播）
德軍啱啱喺主場兩球領先下畀阿根廷逼和，但該役領隊勒夫志在試陣，中堅羅賓高治、前鋒禾特舒密特、中場拿迪安阿美利同蘇奧沙達都如願首次為國家隊上陣，24歲嘅拜仁中場甘美治亦為首度擔任國家隊隊長而高興。不過今晚踢正式賽事，主將紐亞、馬高列奧斯、迪姆華拿同根度簡都會復出，而且佢哋今年每遇一周雙賽，第2場成績總好過第1場（見附表），睇番對手愛沙尼亞今屆歐國外主場3戰皆北共失8球，德軍6月主場曾經大炒過佢哋8蛋，今場作客就算打個5折，都足以開出讓球客勝，更何況畀勒夫改造成正中鋒嘅基拿比近期仲着晒火添！
荷蘭征白俄等下半場走地
至於榜首荷蘭喺稍早時間作客白俄羅斯（有線662及602台周一凌晨零時直播），荷蘭歐國外3連勝共轟11球，包括擊敗德國同北愛兩支爭出線勁敵，前線迪比同賴恩巴布都弗爆，不過要留意佢哋慣性慢熱，呢11個入球得1個係上半場取得，當中7球更喺完場前15分鐘至入，對德國同北愛都係落後下反勝。今晚面對近5仗主場只失3球，僅負0比2同0比1畀德國及北愛嘅白俄羅斯，早段戰情隨時膠着。基於白俄入球能力低，半場細賠率又冇肉食，黑柴建議先小敲2.85倍荷蘭贏1比0嘅半場波膽，到下半場等白俄戰將開始攰，睇啱形勢再走地捧大盤。