周一凌晨歐國外E組大戰，威爾斯主場挑戰「1哥」克羅地亞。威爾斯出線形勢嚴峻，為搶分不惜大舉進攻，然而「格子軍團」貴為世盃亞軍實力超班，絕對有能力乘虛而入，開局反客為主都唔出奇，半場客勝好路。
（香港開電視77台、有線602及662台周一凌晨2時45分直播）
排名E組第4嘅威爾斯，上仗靠前鋒基化摩亞嘅頭槌入波，以1比1打和斯洛伐克搶得1分，為晉級決賽周留下一線生機。取得個人首個國家隊入波嘅基化摩亞當然值得開心，不過呢位效力英冠韋根嘅高中鋒，職業生涯多數時間都喺英格蘭低組別聯賽揾食，實力認真有限，相反效力意甲豪門祖雲達斯嘅艾朗藍斯雖然已經傷愈復出，不過就冇被徵召，多少令人懷疑領隊傑斯嘅選人策略。而且威爾斯防線欠穩問題嚴重，近4仗歐國外都未能保持清白身，對住實力超班嘅克羅地亞，後防隨時再有甩漏。
近4仗歐國外半場全領先
克羅地亞去年歷史性打入世盃決賽之後，曾經有段時間陷入低潮，可幸陣中多位球員包括莫迪歷同拿傑迪錫等，都喺歐洲頂級球會擔任主力，整體實力衰極都有譜。況且「格子軍團」近期歐國外已經重回正軌，上仗以3比0擊敗匈牙利後，暫時高踞E組榜首，為鞏固1哥地位爭取決賽周入場券，肯定繼續積極搶分，克羅地亞近4仗歐國外全部半場就取得領先優勢，呢場對住威爾斯隨時先下手為强，半場客勝值博。