王牌基斯甸艾歷臣唔弗
周五凌晨歐國外D組大戰，丹麥主場強戰瑞士。丹麥雖然至今保持不敗身，但整體表現稍欠說服力，尤其丹麥中場核心基斯甸艾歷臣近排狀態低迷，對住實力相若嘅瑞士，實在無必勝把握，呢場寧願吼實瑞士下盤。
（香港開電視77台、有線602及662台周日凌晨零時直播）
丹麥於上屆歐國外附加賽飲恨，無緣決賽周，好彩去年世盃打入16強振奮軍心，今屆矢志重整旗鼓，D組5戰至今保持不敗位列次席，但當中卻只得2勝，上場仲畀弱旅格魯吉亞逼和0比0，表現未如理想。丹麥嘅最大問題在於王牌球星基斯甸艾歷臣，此子開季至今一直踢唔起狀態低迷，大大打擊丹麥中場嘅組織能力，加上拍檔尤素夫保臣同多爾貝治等表現一般，令國家隊鋒力持續疲弱。相反瑞士近6場歐國外取得4勝2和佳績，相當硬淨，論陣容，一班主力實而不華嘅瑞士，平均質素絕對唔輸丹麥，除咗有效力阿仙奴嘅隊長格列沙加，前鋒施費洛域、守將列卡度洛迪古斯都係歐洲豪門主力，有力同丹麥周旋，瑞士受讓有計。
格魯吉亞愛爾蘭吼半和
至於同組先開波有格魯吉亞主場挑戰小組「1哥」愛爾蘭，愛爾蘭喺領隊麥卡菲帶領下穩步上升，今屆歐國外至今交出3勝2和好成績，今場最令愛爾蘭球迷期待嘅，肯定係小將艾朗干洛尼首次為國家隊披甲，呢位白禮頓19歲o靚仔上場聯賽個人梅開二度，幫助球隊爆冷以3比0重創熱刺，其實除咗佢仲有唔少愛爾蘭主力都喺英超揾食，整體質素有保證。愛爾蘭開局踢法四平八穩，過去11場比賽上半場都冇失波，對住已經穩袋附加賽資格嘅格魯吉亞，兩軍初段必然抱住睇定嚟踢心態，吼半場和。
（有線603及604台周六晚9時直播）