歐國外J組大戰，意大利主場迎戰希臘。意大利6戰全勝高踞榜首，今仗只要贏波便可取得決賽周入場券；相反希臘今場失分就會提早出局，今場冇退路一定要焗攻，首選中位數2.5球入球大。
（有線602及662台周日凌晨2時45分直播）
意大利贏波即提早出線
意大利於J組一枝獨秀，踢完6輪分組賽以全勝姿態帶頭，場場起碼入兩球，為提早搶得決賽周入場券，今場勢必繼續强攻。文仙尼麾下嘅意大利，已經擺脫以往悶氣沉沉、穩陣為上嘅保守作風，取而代之係充滿朝氣嘅進攻足球，全因「藍衫軍」現時中前場好手如雲，除有兩大前鋒恩莫比尼與比洛迪衝鋒陷陣，上場因傷缺陣嘅恩斯治尼亦已康復可以候命，加埋今季喺國際米蘭表現出眾嘅尼高路巴列拿，中前場創造力極有保證。不過意大利近期防線唔算穩陣，對上3場歐國外都有失波，加上中堅基亞連尼重傷長抖，令防線更添隱憂，今場失波一啲都唔奇。
希臘今屆歐國外6戰僅獲1勝2和3負，現得5分排尾二，如果今場贏唔到就可以宣布執包袱，破釜沉舟冇得再守。希臘今屆3場歐國外作客除咗0比1輸畀冰島之外，其餘2場都有入波，既然意大利近5場歐國外總入球全開3球或以上，中位數2.5球大盤偏熱依然值捧。