地獄主場夠硬淨
周五凌晨歐霸大戰，L組曼聯將會作客面對柏迪遜。整體表現低迷嘅「紅魔」，進攻乏力問題頻頻遭人詬病，加上陣中多位主力繼續因傷倦勤，呢仗要造訪柏迪遜嘅地獄主場更加唔敢冒進，戰況隨時陷入膠着，中位數2.5球入球細值得留意。
（MyTV Gold 303台、Now 643、有線616及656台周五凌晨零時55分直播）
曼聯今季開局令「魔迷」失望，除聯賽頻頻失分，排名逐漸向降班區靠攏之外，歐霸表現都唔見好得去邊。睇過歐霸L組形勢，相信大部分球迷都會認為曼聯作為歐洲豪强，要爭出線應該難度不大，可惜「紅魔」分組賽兩戰過後表現明顯欠缺說服力，首戰靠小將格連活特嘅入波1比0僅勝艾斯坦拿之後，次仗只能0比0悶和阿爾克馬爾。尤其前場無論係「福仔」拉舒福特或丹尼爾占士，都唔係以射術見稱，呢場安東尼馬迪爾雖然傷愈復出，不過法國前鋒啱啱好番狀態難有保證，加上費特洛迪古斯等中場對進攻組織貢獻有限，曼聯前場缺乏支援隨時又再啞火。
紅魔近9仗全開2球或以下
塞爾維亞勁旅柏迪遜今季由外圍賽第2圈打起，分別淘汰康納斯碼頭、馬拉蒂亞同莫迪，去到分組賽再先後賽和阿爾克馬爾同擊敗艾斯坦拿，表現夠硬淨，不枉「壓路機」嘅外號。而且陣中有前曼聯中場蘇蘭托錫呢場倒戈相向，質素有保證。各項賽事近9仗全開2球或以下嘅「紅魔」，想喺充滿敵意嘅柏迪遜地獄主場搶分絕對唔容易，寧願捧中位數2.5球入球細好過。