巴塞隆拿喺西甲頭場作客伊巴，今場會相當難踢！伊巴經過季初一段小低潮之後，近4場聯賽保持不敗，絕對唔怕巴塞來襲，加上巴塞後防定海神針碧基停賽，更加唔怕同巴塞鬥攻。「地上最強」有美斯翻生，蘇亞雷斯亦交到貨，聯賽要力追皇馬，即使下周要踢歐聯，亦冇留力空間，雙方近8次交手6次開4球或以上，中位數3.5球大值得再追。
（Now 632周六晚7時開賽）
由於西班牙最高法院重判9名加泰羅尼亞獨立運動領袖，導致尋日爆發大罷工，影響航班升降，巴塞隆拿原本計劃下晝練完波，先坐包機北上再轉旅遊巴搭40公里到達酒店休息，但依家擔心機場有阻滯，萬一航機遲到影響球員休息，導致演出失準就弊家伙，所以決定一早就全程搭旅遊巴，兩地相隔589公里，6個鐘左右就到，雖然時間長啲，但起碼有個預算。
碧基停賽防線唔穩陣
「地上最強」咁緊張，全因為呢3分對佢哋好重要，依家佢哋只係落後皇馬2分，下周歐聯只係作客捷克弱旅布拉格斯拉維亞，唔需要特別留力，美斯、蘇亞雷斯同基士文都可以上陣，實行狂轟伊巴大門。不過，巴塞今仗有碧基、奧士文尼迪比利及朗奴阿拿祖坐波監，當中冇咗碧基影響最大，咁啱對手個前鋒奧利蘭拿當弗，最近3場都有士哥，係伊巴頻頻搶分嘅主要功臣，今場又有機會騷吓哥利，況且翻查紀錄，兩軍近8次對碰，有6次總入球達4球以上，相信今場都係一場入球騷，3.5球大有買趁手。