經過兩日歐聯連場惡戰後，今晚輪到歐霸分組賽第3輪上演，其中F組上屆亞軍阿仙奴喺主場迎戰甘馬雷斯。阿仙奴啱啱喺聯賽輸波，主帥艾美利亂咁排陣備受批評，今仗唔會hea踢，而且佢哋於主場踢歐霸堅搶韁，實搵甘馬雷斯出氣，隨時一開波即撳住搶，半場主勝值得捧場。
（myTV Gold 303、Now 643、有線656及616台周五凌晨3時直播）
老實講，英超有利物浦同曼城兩大巨頭，阿仙奴想爭都冇乜機會，惟有向盃賽埋手。自己係過來人，明白只有贏過冠軍嘅球員，先會明白箇中滋味，從而衍生不斷追求勝利嘅飢渴感，同樣地，作為一支家道中落嘅傳統勁旅，阿仙奴為免淪為二流球隊，想「中興」就需要奪得具分量嘅錦標，何況贏歐霸冠軍仲可以攞埋下屆歐聯入場券添，無疑可增強鬥心。
對甘馬雷斯吼半場主勝
查實阿仙奴係連續兩屆歐霸4強分子，上屆更殺入決賽，可惜輸畀倫敦死敵車路士屈居亞軍，對於「歐霸專家」主帥艾美利嚟講，確係遺憾，考慮到佢上季先接手「兵工廠」有排執，亦可理解，但去到今屆班波都係踢到冇乜章法，日前聯賽作客輸畀錫菲聯，更畀人狂鬧佢排陣失當，今仗對甘馬雷斯實在唔衰得。今屆頭2場分組賽全勝嘅阿仙奴，原來主場出戰歐霸特醒，近6場贏晒之餘，仲全部喺上半場已領先，相反甘馬雷斯喺今屆頭2場分組賽輸晒，更1球都入唔到，造訪急於反彈嘅「兵工廠」，真係半場都捱唔住，不妨博半場主勝。