後防甩漏神鋒養傷
周六晚德甲壓軸演好戲，多蒙特主場迎戰一哥慕遜加柏，多蒙特近8次對賽贏晒，往績一面倒，不過球隊近期頻頻失分，防線輪流犯大錯甩漏極多，加上首席射手柏高艾卡沙因傷缺陣，面對弗爆嘅慕遜加柏並冇贏波把握，仲要讓球一球、球半未免過分，黑柴推介下盤。
（Now 670、FOX+、有線651及611台周日凌晨零時30分直播）
多蒙特聯賽3連和不停失分，對手仲唔係勁旅，積分榜已經跌至第8位，最慘係連續3仗都失兩球，防線輪流犯錯，被寄予厚望嘅中堅文路爾艾簡治踢到冇晒信心，今仗仲有首席射手柏高艾卡沙養傷，前線火力大減，雖然主場出擊有追分決心，但以近況計實在冇條件讓到咁多，更何況下周中歐聯要同國際米蘭踢關鍵戰，今仗就算領先咗亦唔會去得太盡。
德甲近兩輪客隊大旺
慕遜加柏經過8年等待，喺新帥馬高路斯帶領下終於過到一哥癮，當然唔希望咁快落番嚟，球隊近期聯賽4連勝，前線入波仲一仗比一仗多，除咗3位攻擊重心柏利亞、馬古斯杜林同比列安保路踢出流暢嘅組織進攻外，連經常因傷長抖嘅好波之人靴爾文都弗番晒，令到前線爭位情況嚴重，近期整體演出明顯在多蒙特之上。何況今季德甲大旺客隊，經過7輪63場比賽，主勝只有23場，客勝就有25場，如果單計近兩輪，客隊更取得10勝5和僅3負佳績，慕遜加柏今季更加係3場作客全勝添！雖然佢哋今仗有守將馬菲亞斯真達缺陣，右閘史堤芬拉拿上陣成疑，但面對火力減弱嘅多蒙特，大敗可能性唔高。