雙紅會蘇B最後餐士
今晚英超曼聯主場同利物浦合演「雙紅會」。利物浦開咧8戰全勝勢如破竹，今場再贏就會平咗英超最長嘅18連勝紀錄；反觀曼聯創下30年來最差開局，盛傳領隊蘇斯克查今仗再輸就落鑊，面對死敵更不能「認命」，必「泊大巴」望唔失波先，「紅軍」喺聯賽遙遙領先，有籌碼睇定食，中位數2.5/3球細盤首選。（Now 621及611周日晚11時30分直播）
樂比喺國際賽檔期前講過，短期內唔會同利物浦作對，結果上輪對李斯特城成功命中「讓球和」同半場細，究竟今場又有乜策略？坦白講「紅軍」目前當頭起，就算你覺得佢贏唔到都千祈唔好買佢對家，因為「紅軍」個體系Run得好順，除非季中遇到傷兵、狀態下滑等問題，投注策略先再作調整都未遲，現階段只宜同佢搭埋同一條船，又或者改向其他投注項目埋手。
利物浦近年作客Big 6嘅戰略，領隊高普都相當保守，上季作客奧脫福就踢成0比0平手，另外作客車仔、阿仙奴都係1比1收場，可見喺高普心目中，呢啲大戰都係穩陣行先，和波係可以接受嘅戰果，喺咁嘅思維下，相信佢哋今場亦唔會太過冒險或主動進攻。
紅魔殘陣更專注防守
主隊曼聯目前陷入結構性問題，可以話神仙難救，「蘇B」領軍初期雖然能激勵球員，但現時明顯已江郎才盡，進攻毫無板斧，防守甩漏又多，面對利物浦唯一招數係只能以局部性嘅人多取勝，收窄防線再加少少狠辣，成唔成功就要睇球員發揮。
老實講曼聯如果架大巴泊得好，都有一定搶分機會，即使今場兩大主力迪基亞同保羅普巴因傷缺陣，雲比沙卡、安東尼馬迪爾、連格、格連活特及達洛治據報亦有傷，但樂比又唔係太擔心，因為夫添嘅曼聯亦唔見得強，依家殘陣專注防守，激起鬥心隨時效果更佳。國際賽後球員遊完飛機河，狀態有起伏在所難免，如果今場戰況陷膠着，樂比唔會意外。