上屆4強經驗幫到手
歐聯第3輪分組賽繼續開打，周四凌晨荷甲勁旅阿積士喺H組主場鬥英超代表車路士。阿積士承接上屆殺入4強餘威，今屆頭2場分組賽先後大勝里爾同華倫西亞，絲毫未見退步；林柏特領軍嘅車路士空有活力、經驗不足，呢場作客遇上勢如破竹嘅阿積士料難逃一敗，主勝值捧。
（myTV Gold 303、Now 643、有線616及656台周四凌晨零時55分直播）
上屆殺入4強嘅阿積士，今季雖有法蘭基迪莊同馬菲斯迪歷特離隊，但其餘主力包括杜辛泰迪治、雲迪碧克、薛耶治同大衞拿尼斯仍然留效，配合新加盟嘅荷蘭國腳昆斯普美斯同阿根廷守將利辛度馬天尼斯，整體實力同上季絕對有得揮。呢支荷甲傳統勁旅今屆歐聯由第3圈外圍賽開始角逐，先後淘汰PAOK及尼科西亞，嚟到分組賽再以雷霆萬鈞之勢以3比0擊敗里爾同華倫西亞，近5場歐聯豪取4勝1和，表現極具說服力。
車路士新兵掛帥易出錯
車路士今屆重返歐聯靠年輕球員擔起大旗，主帥林柏特亦係首次以領隊身份出戰，臨場發揮同經驗明顯差啲火候。車仔開季至今聯賽連盃賽踢了13場，只有2場保住清白身，後防存有唔少漏洞，嚟到歐聯賽場，一次錯誤足以致命，首場分組賽主場對華倫西亞輸0比1就係最佳例子，面對同以年輕球員作重心、卻經過上屆4強洗禮嘅阿積士恐被比下去，阿積士主勝可投以信心一票。