今晚英超大戰，車路士坐鎮史丹福橋迎戰紐卡素。大打青春風暴嘅「車仔」表現漸入佳境，其中頭號射手譚美阿巴謙同中場新星美臣蒙特成功上位，加上佢哋近年對住「喜鵲」佔盡上風，今場有望再趁主場之利全取3分，上盤好路。
（Now 621周六晚10時直播）
車路士名宿林柏特上任後，「限米煮限飯」下大膽起用多位年輕球員，收到意想不到效果，除上季跟隨佢喺打比郡征戰英冠嘅美臣蒙特外，近年不斷淪為「人球」嘅前鋒譚美阿巴謙，亦獲上位機會，兩位後生仔亦冇辜負「林伯」信任，頻頻交出高水準表現，剛啱嘅國際賽檔期仲雙雙獲英格蘭國家隊青睞，披上「三獅戰袍」，當中譚美阿巴謙今季聯賽已轟入8粒，同曼城阿路古並列榜首，配合佐真奴費路同巴克里等人，鋒力唔係講笑。
紐卡素近4作客吞3敗
紐卡素上仗爆冷贏曼聯踢出士氣一役，其中小將馬菲朗達夫橫空降世，同阿哥桑恩朗達夫組成嘅中場線活力十足，可算係令「喜鵲」球迷喜出望外。可惜佢哋整體質素依然欠奉，尤其近4仗作客慘吞3敗，搶分能力一般。況且車路士近7次主場對紐卡素全勝，未踢個勢都贏晒，加埋挾各項賽事4連捷嘅勇態，讓球半／兩球唔怕辣，照跟上盤。