難忍上屆遭柏達邦雙殺
周日晚德甲頭場榜尾大戰，尾二嘅科隆主場迎戰包尾嘅柏達邦，科隆開季諸事不順，雖然近期表現同鬥志都有起色，但連仗遇強發唔到圍，其實科隆人腳實力同經驗都遠勝柏達邦，今晚難得遇弱誓要打開今季主場勝利之門，科隆因為近績同對賽往績都差而只係小讓半一，黑柴捧上盤。
（Now 670、FOX+、有線651及611台周日晚9時30分直播）
科隆前季不幸降班，好在兩名國腳級領袖漢恩同祖拿斯赫達捱義氣，放棄轉會陪降，終於以超班姿態攞到上屆德乙冠軍，柏達邦就緊隨其後齊齊升班，勢估唔到依家兩隊又齊齊淪落榜尾，科隆上屆順風順水，唯一唔順嘅就係聯賽畀實力次一皮嘅柏達邦雙殺，不過今屆兩軍差距拉進一步拉遠，柏達邦因為財困冇錢買人仲要賣人，相反科隆積極擴軍志不在小。
上仗和史浩克有番朝氣
可惜嘅係，科隆升班後先出現傷兵潮影響開局，近期傷情改善又連仗遇強敵，上輪作客大勇嘅史浩克終於踢番爭氣波，國腳隊長祖拿斯赫達喺補時為球隊扳平，而且睇番全場形勢佢哋不落下風，明顯有番朝氣，攞呢一分對士氣幫助亦好大，今晚聲言擺大頭搶攻，博今季主場開齋。
柏達邦升班後場場搏盡，季初用閃擊戰術頻頻開賽初段偷雞入波，教練史堤芬包姆加特已經諗盡辦法，只可惜眾將始終未夠德甲水準，搏到依家都只得1分敬陪末席，即使已經踢咗7輪比賽，教練承認仲未試出最佳陣容，今晚會畀機會較少落場嘅球員，睇吓仲可唔可以試出彩虹，作客面對志切求勝嘅科隆幾難偷雞。