話得係今屆歐聯嘅死亡F組，多蒙特、巴塞、國米同布拉格斯拉維亞嘅實力都有番咁上下，可能巴塞會高少少，而視為較弱嘅斯拉維亞，喺首輪作客國米都差啲贏埋，最終被逼和亦證明佢哋唔易啃。講番今晚F組重頭戲，國米主場迎戰多蒙特，前者今仗不容再失，「蜜蜂兵團」都想搶分博出線，鬥攻「大」戰一觸即發。
（有線662及602台周四凌晨3時直播）
近10場正式賽事全入波
與聯賽穩定表現相比，國米於歐聯明顯緊張，頭2輪只得1分，想爭出線今仗必定要贏，主帥干地會向眾將灌輸背水一戰嘅心態，鼓動士氣呢方面亦係佢最擅長。而且雙箭頭盧卡古同拿達路馬天尼斯愈來愈夾，兩人包辦晒球隊近3仗嘅6個士哥，甚至彼此確立「12碼輪射制」，其中近2仗所獲得嘅3個「極刑」，兩人梅花間竹輪住操刀，睇得出佢哋冇爭食相當融洽，難怪自今季開咧後，國米於10場正式賽事均有入波。
至於有4分在手嘅多蒙特，當然都想贏波，希望盡快搶夠分晉級，王牌馬高列奧斯日前聯賽對慕遜加柏，帶病上陣都一箭定江山，而該仗因紀律問題被內部停賽嘅快翼查頓辛祖，今仗肯定會復出，連同杜根夏薩特，火力不容小覷。不過首席門將路文貝基上仗傷出，今仗未必趕及把關，焗用後備門將馬雲希斯堅唔穩陣，隨時以攻代守，預計會合演精彩嘅入球騷。