迪布尼復出重灌火力
今晚英超尾場，「2哥」曼城作客水晶宮。英超開咧僅8輪，衞冕嘅曼城已經畀榜首利物浦甩開8分，嚟緊每一場可以話不容再失，「助攻王」奇雲迪布尼及時復出，「藍月亮」勢必火力全開，不過近年碰頭水晶宮每每有「神經刀」演出，寧捧3.5球嘅大盤更上算。
（Now 621及611周日凌晨零時30分直播）
曼城頭8場聯賽3度失分，包括爆冷輸畀諾域治及狼隊，依家畀8連勝嘅「1哥」利物浦拋離8分。不過睇番「藍月亮」上季亦曾一度落後7分，最終都可後上封王，畢竟現時仲係季初，只要往後保持連勝，反先絕不是夢，嚟緊賽事只會更有決心。曼城一向進攻大過天，王牌阿古路暫以8球位居射手榜榜首，史達寧喺早前國際賽亦頻有進帳，最緊要係奇雲迪布尼亦傷愈候命，呢位比利時中場今季聯賽已交出8次助攻，排緊助攻榜「1哥」位，有佢支援阿古路及史達寧實大把機會，單睇佢哋今季4場聯賽作客狂轟13粒，全開4球或以上，就知火力有幾勁喇。
近年對賽形勢均等
現排第6嘅水晶宮論牌面可能唔及曼城，但今季演出可人，曾經贏過曼聯及韋斯咸，絕對唔失禮，而且主帥鶴臣擅打突擊，坐擁「魔翼」韋費特沙夏、安祖斯唐辛及正前鋒佐敦阿休，狂打反擊常令強隊措手不及。
翻查兩軍近3次聯賽碰頭，各得1勝1和1負，包括上季水晶宮作客反勝3比2，而前季主場悶和0比0之役，如果唔係米利禾積域末段射失12碼，戰果已經改寫，可見水晶宮對住曼城，唔會「肉隨砧板上」，不妨捧3.5球嘅入球大。