今日澳職好戲，上季季後賽冠軍ＦＣ悉尼主場鬥威靈頓鳳凰。ＦＣ悉尼今季為頭號射手方祖搵嚟好拍檔巴巴路西斯，威脅銳增；相反鳳凰有多位核心離隊，成隊波散晒有排執，作客更頂唔得幾耐，捧半場主勝。
（MyTV Gold 302、Now 639、有線615及655台周日下午3時直播）
方祖弗爆首戰起孖
悉尼今季雖有荷蘭中場施安迪莊離隊，好彩由墨爾本勝利加盟嘅巴巴路西斯，無論侵略性或把握力都有過之而無不及，為前線注入新活力，加埋上季聯賽轟入16球嘅方祖，ＦＣ悉尼仍被視為今季爭標熱門。
悉尼揭幕戰就係憑方祖梅開二度，作客3比2贏阿德萊德聯，氣勢正盛，今場有望乘勢追擊。
鳳凰今季陣容大變，教練魯丹連同主力基舒拿及隊長杜蘭迪離隊，繼季前喺澳足盃畀非職業隊伍布里斯班前鋒淘汰後，聯賽首戰主場對新軍西部聯再以0比1見負，證明實力大倒退。加上近6次鬥ＦＣ悉尼僅得1勝5負劣績，當中4次半場就落後，今場作客隨時由頭輸到落尾，半場主勝值得留意。