周三凌晨歐聯C組，曼城主場鬥阿特蘭大，「藍月亮」多位主力後衞有傷為防線埋下隱患，為免夜場夢多唯有快快脆搶攻，尤其面對防守唔算出色嘅阿特蘭大，曼城一班攻擊手大把機會發圍，肯定唔會同你客氣，中位數1.5球半場大值博。
（MyTV Gold 303、Now 643、有線616及656台周三凌晨3時直播）
受球員傷病困擾，「藍月亮」後防近期兵源短缺，繼主力後衞拿樸迪重傷要長做十字軍之外，另一守將奧達文迪都整親，加上史東斯啱啱傷愈狀態難有保證，曼城中堅人腳更難應付多線作戰，上仗聯賽面對水晶宮，領隊哥迪奧拿就焗住派出費蘭甸奴同洛迪卡斯簡迪兩位防中頂住檔先，最終都係要靠一班當弗前場攻擊組合快刀斬亂麻，上半場迅速搶得2比0領先優勢，最終擊敗對手，呢場趁阿特蘭大開局未站穩陣腳，曼城隨時照辦煮碗再搶攻。
阿特蘭大重攻輕守
況且初次打入歐聯正賽嘅阿特蘭大，雖然陣中有杜雲沙柏達同艾真度高美斯等實力型猛將壓陣，可惜歐戰經驗欠奉，分組賽頭兩戰輸晒，而且全部半場開2球或以上。尤其阿特蘭大重攻輕守嘅踢法，經常令球隊早早就落後陷入被動，呢場如果死性不改一味掛住攻，對住曼城呢支歐洲頂級勁旅隨時一開波就輸幾粒，中位數1.5球半場大係好路。