西部聯新埋班未夾熟
澳職周六上演兩場比賽，頭場新軍西部聯主場鬥珀斯光輝；西部聯上周首戰澳職旗開得勝，其他球隊唔敢輕視佢哋，想再爆冷唔易；上季常規賽冠軍光輝今季加入烏拉圭射手科拿路利後，實力如虎添翼，爭開齋決心夠，平手盤捧光輝。
（myTV Gold 302、Now 639、有線615及655台周六下午2時直播）
西部聯雖然新埋班，但陣中有前意大利國腳迪亞文迪、澳職殿堂級射手貝利沙及前澳洲國腳史葛麥當奴，實力唔曳，揭幕戰就係憑貝利沙一箭定江山，作客1比0擊敗威靈頓鳳凰，不過西部聯上場正選陣容有7位球員年過30，包括上述3大進攻主力，中堅杜蘭迪更已37歲，活力不足隨時成致命傷，而且新軍默契始終爭啲，要喺夾慣夾熟嘅光輝身上攞甜頭唔易。
光輝上場補時階段畀獅吼逼和1比1痛失2分，不過光輝上季常規賽首戰亦係喺領先下被西悉尼流浪者逼和，之後12場聯賽一鼓作氣攞到10勝1和1負，包括6場作客豪取5勝1和，最終領放到尾贏得常規賽冠軍，今季隨時照辦煮碗。光輝今季獲前墨爾本城射手科拿路利加盟，配合原有主力迪亞高卡斯度及伊高路美迪斯，鋒力強橫，為響勝鼓作客照搶，平手盤值捧。
「F3公路打吡」噴射機有計
至於尾場中岸水手主場鬥紐卡素噴射機，兩間球會所在位置由一條「F3公路」相連，彼此距離係所有澳職球會中最近，所以又名「F3公路打吡」。上周輪空嘅噴射機近6次作客水手贏5次，頗有格食格味道；水手上仗作客西悉尼流浪者輸1比2，睇嚟仲未擺脫近年頹勢，一於捧客Ｗ啱數。
（myTV Gold 302、Now 639、有線615及655台周六下午4時30分直播）