第4任老竇夏薩特回歸
今晚歐聯A組第3輪重頭戲，皇家馬德里作客火併加拉塔沙雷。「銀河艦隊」喺今屆歐聯出閘脫腳，頭2仗未贏過，為搶分晉級不容再失，撞正「私房菜」加拉塔沙雷，絕對係開齋好時機，皇馬讓半一，上盤捧得過。
（Now 645、有線603及604台周三凌晨3時直播）
貴為13屆歐聯（連歐冠）盟主，皇馬今屆先喺首輪慘吞巴黎聖日耳門3蛋，上輪竟然先落後2粒，幾經辛苦先逼和布魯日2比2，依家兩戰未贏過只得1分排包尾，真係冇晒飛士，好彩只落後次席布魯日1分，形勢唔太壞，但往後賽事不能再甩轆，必須搶分爭出線。雖然皇馬近況麻麻，啱啱聯賽爆冷輸畀馬略卡，而且傷兵唔少，但正好畀「邊緣人」占士洛迪古斯有機會爭取表現，而且「夏神」夏薩特日前因老婆臨盆特准畀佢放假，並且誕下佢哋第4個小朋友，人逢喜事精神爽，呢位比利時隊長今仗一定加多兩錢肉緊。
加拉塔沙雷近7對賽6負
加拉塔沙雷雖有法卡奧、賴恩巴布、長友佑都等助陣，但喺頭2輪歐聯分組賽，同皇馬一樣只獲1和1負僅得1分，冇乜優勢可言，而且呢支土超勁旅近年喺歐洲賽無甚佳作，近7場歐聯只得2和5負，其中6場更交白卷，見到都唔開胃，就算有地利都靠唔住。何況兩軍近7次交手，皇馬豪取6勝1負，加拉塔沙雷擺明係佢哋「私房菜」，仲唔趁熱食咩，上盤有計。