周日凌晨美職季後賽淘汰圈，打頭陣有阿特蘭大聯主場鬥新英倫革命。衞冕季後賽嘅阿特蘭大聯整體實力強勁，尤其頭號射手祖斯夫馬天尼斯已經傷愈復出，攻力有保證。兩隊近期交手，阿聯表現搶韁，為免夜長夢多，今次肯定先下手為強，半場主勝有計。
阿特蘭大聯短短加盟美職3季都打入季後賽，上季更首奪季後賽冠軍，無論經驗同實力都堪稱係美職數一數二。今季球隊由荷蘭主帥法蘭迪保亞領軍，走勢強勁，喺東岸取得常規賽第2成績，其中前鋒祖斯夫馬天尼斯繼上季常規賽勇奪神射手之後，今季繼續有27球常規賽入波斬獲，腳風順到冇朋友。此子季尾傷出，外界一度預計佢會錯過季後賽，不過呢位委內瑞拉前鋒康復神速，常規賽最後一戰復出兼再度入波，幫助球隊以3比1擊敗今場對手，呢次再遇革命，阿特蘭大聯只要照辦煮碗，贏波問題不大。
新英倫革命過去連續3季無緣季後賽，今季都係掹車邊先晉級，表現欠缺說服力。革命致命傷在於後防欠穩，常規賽失57球，係季後賽列強中防守成績第二差嘅球隊。況且兩軍近4次交手，革命輸咗3場，其中3次半場就已經落後，今場作客隨時由頭輸到落尾，捧半場主勝好過。