國際賽期後日職戰火重燃，周五黃昏時間北海道札幌岡薩多將會主場硬撼大阪櫻花。櫻花為追逐亞冠席位仲要加把勁，好彩佢哋近排作客搶分特別醒，加上對手岡薩多仲要留力踢日聯盃決賽，今場聯賽未必會搏盡，變相益咗櫻花，馬會開平手盤，客隊要得過。
（有線602及662台周五晚6時直播）
近年異軍突起嘅岡薩多，今季喺主帥柏度域帶領下成績有目共睹，早前日聯盃4強淘汰大阪飛腳之後，仲歷史性首次殺入決賽，喺聯賽爭奪亞冠資格機會渺茫嘅情況下，相信一班岡薩多球員嘅心思早就飛晒去日聯盃決賽嘅大戰，因此今場聯賽大有可能留力。尤其岡薩多近期日職甩轆情況嚴重，近3場錄得1和2負，包括上輪0比5慘敗飛腳之下，聯賽表現難有保證。
近6場聯賽贏5仗
相反櫻花近期聯賽頻頻搶分，近6場聯賽豪取5勝，早前仲喺惡鬥飛腳嘅打吡戰，以3比1取勝，近7年首次聯賽擊敗同城死敵，表現夠晒爭氣。而且櫻花近3場聯賽作客全勝，當中造訪強敵橫濱水手都有本事袋走3分，今場有力乘勢再反客為主，平手盤一於捧櫻花。