前線唔齊腳老鼠拉龜
今晚英超獨腳戲，阿仙奴作客硬撼升班球隊錫菲聯。阿仙奴箭頭拿卡錫迪未必出得，貴價新兵尼高拉斯比比淪為水貨，單靠射手奧巴美揚數胡，造訪做慣縮頭烏龜嘅錫菲聯，要入波唔容易，2.5球細盤有分頭更值博。
(Now 621周二凌晨3時直播)
連盃賽在內，阿仙奴近6仗豪取5勝1和，射手奧巴美揚今季各項賽事攻入8球，更當選上月英超最佳球員。不過箭頭拿卡錫迪啱啱先好番，狀態未夠十足，主帥艾美利坦言仍未決定佢今仗能否披甲，貴價新兵尼高拉斯比比就仲未適應英超，加盟至今只係入得1粒12碼，更經常失機同斷纜，齋靠「羊羊」數胡點都爭啲。
至於艾美利與王牌奧斯爾嘅關係，可謂撲朔迷離，艾帥開口埋口讚「奧燒」狀態愈嚟愈好，但今季只係派佢出場2次咁大把，明顯呢位前德國國腳早已不在計劃之內，連同年輕翼鋒雷斯尼爾遜因傷要抖到11月，令艾帥臨場想加強進攻卻缺乏變招。值得留意嘅係，阿仙奴喺各項賽事失咗11粒，防線唔算穩陣，客場出擊唔敢亂攻。
錫菲聯鐵桶陣守得
另一邊廂，升班球隊錫菲聯質素所限，幾乎場場都做縮頭烏龜，擺出鐵桶陣死守，近4仗聯賽加埋只失2粒，全開2球或以下，包括主場迎戰火力強勁嘅「1哥」利物浦，只因門將甸恩軒達臣失誤「屙蛋」至輸0比1，證明佢哋守得兩嘴。今仗主場迎戰前列分子阿仙奴，一定照辦煮碗，不如轉捧有逾2倍分頭嘅2.5球細盤好過。