流浪者防線穿窿
澳職周五上演獨腳戲，墨爾本勝利主場鬥西悉尼流浪者。西悉流首戰贏得驚險，防線仍有不少需要改善地方，球隊上季13場常規賽作客只有1場冇失波，當中11次開3球或以上；勝利今季雖然大執位，但進攻實力有增冇減，經過澳足盃同首場聯賽熱身，應會慢慢好轉，可以同西悉流上演入球騷，揀中位數2.5球大穩陣。
（myTV Gold 302、Now 639、有線615及655周五下午4時30直播）
上季季後賽4強出局嘅墨爾利勝利今季大執位，領軍接近6年嘅教練梅斯卡特離隊，改由前阿德萊德主帥馬高告斯接手，球員方面則放走本田圭佑同巴巴路西斯，補入羅比古斯、納博特配合原有嘅前瑞典國腳托禾倫，整體實力有增無減。雖然首輪聯賽對同市宿敵墨爾本城最終踢成0比0，但相信經過呢場比賽後，勝利可以建立起默契，進攻方面唔會有大問題。
全新防線欠默契
西悉尼流浪者首戰贏波，憑米歇爾杜基梅開二度，包括完場前8分鐘射入12碼，險勝中岸水手2比1，佢哋今季羅致咗曾奪德甲神射手嘅美亞助陣，鋒力毋庸置疑，不過上場正選後防包括祖文、戴恩麥高雲、丹尼爾佐治夫斯基及柏德列施格拿都係新加盟球員，合作時間較短，難免有甩漏，加上西悉流上季聯賽常規賽作客只有1場保持清白身，13場共失30球，今季陣容大變更難即時有改善，既然兩軍前鋒球員均有質素，後防卻同有不足，今場出現大手交易機會高，捧入球大最啱數。