周日早上美職季後賽東岸淘汰圈賽事，由FC多倫多主場硬撼華盛頓聯隊。FC多倫多雖然近10場聯賽未輸過，但和波偏多不宜高估，相反華盛頓聯王牌朗尼離隊在即，臨走前梗係想捧盃贈興，今場一定搏甩髀，況且華盛頓聯近5次交手未輸過，受讓必捧讓球客勝。
查實兩軍於東岸常規賽同得50分，連贏波場數都一樣，FC多倫多以較佳得失球壓過華盛頓聯排第4位，可見係勢均力敵。FC多倫多今季靠前鋒艾迪杜里及進攻中場普素路數胡，兩人於聯賽合共攻入23球，不過佢哋踏入季尾明顯狀態跌Watt，在最後10輪聯賽夾埋只入5粒，令FC多倫多雖於呢10場保持不敗，但只得4勝6和，勝率僅得4成，欠缺贏波把握。
朗尼離隊爭尾彩
華盛頓聯王牌朗尼早已宣布於明年1月重返英倫，加盟英冠「綿羊」打比郡，意味住佢嘅美職生涯已進入倒數階段。堂堂英格蘭國家隊史上「士哥王」，朗尼上季未能殺入季後賽堅失威，好彩今季終於進身季後賽，梗係希望好嚟好去，最好當然係有盃捧，因此戰意必堅，而且佢喺最後一輪聯賽停賽，變相可養精蓄銳備戰今仗。翻查紀錄，兩軍近5次正面交鋒，華盛頓聯取得1勝4和未輸過，絕對不落下風，仲有得受讓咁筍，讓球客勝咪錯過。