歐國外轉入最後直路，唔少球隊陸續攞到決賽周席位，今晚上演D組、F組及J組賽事，愛爾蘭同西班牙都有機會提早出線。先講D組榜首愛爾蘭作客鬥瑞士，愛爾蘭現時領先第3位嘅瑞士4分，今場只要贏波便可穩奪決賽周入場券，不過佢哋今屆6場歐國外只入6球失2球，上場作客弱旅格魯吉亞都贏唔到，呢場對住實力更高嘅瑞士相信會更難打。瑞士上場作客丹麥輸0比1，今屆歐國外首次輸波，賽後落後愛爾蘭及丹麥4分，出線形勢告急，「瑞士美斯」梳頓沙基利有傳不滿主帥柏高域任命格列沙加做隊長，連續2次國際賽被棄用，大大影響瑞士進攻能力，主場出擊難佔甜頭。總計各項賽事在內，愛爾蘭近12場有10次開半場和，今場值得再追。
（有線603及604台周三凌晨2時45分直播）
西班牙恰慣瑞典吼客勝
至於F組嘅西班牙會作客鬥瑞典。西班牙上場作客挪威喺補時階段輸12碼，被挪威逼和1比1未能提早晉級，不過佢哋仍然領先排第2嘅瑞典5分，只要今場和波便可鎖定出線資格。西班牙上場正選11人來自11間唔同球會，係近99年來首次出現呢個情況，默契自然打折扣，好彩經過上場「熱身」，今場表現應該有改善。瑞典近年陣容嚴重老化，上場4比0贏馬爾他嘅正選陣容，有8人係年近或者超過30歲，包括梅開二度嘅34歲老將施巴斯坦拿臣，活力欠奉；相反西班牙近年有洛迪高摩連奴、丹尼施巴路斯、奧耶沙巴爾及洛迪卡斯簡迪等小將掘起，加上近3次交鋒西班牙全部贏晒，有格食格味道，西班牙作客有力贏波晉級，客勝可捧。（有線602及662台周三凌晨2時45分直播）