今晚西甲壓軸尾場，「1哥」皇家馬德里作客升班球隊馬略卡。皇馬慘中「FIFA病毒」，莫迪歷、加里夫巴利先後中招，傷兵唔少，而且每逢客場出擊，經常老鼠拉龜冇碇埋手，馬略卡亦甚少畀今仗倒戈嘅日本新星久保建英擔正，初段唔敢冒進，不妨轉玩半場和。
（Now 632及611周日凌晨3時直播）
國際賽期對一眾歐洲豪門嚟講，都係有苦自知，皇馬亦唔例外，啱啱打完兩周「太公波」，就有中場莫迪歷、前鋒加里夫巴利帶傷而回，今仗肯定缺陣，烏拉圭小將費達歷高華維迪啱啱先歸隊，應該畀佢抖抖，連同本身有華拉尼、盧卡斯華斯基斯、馬高阿辛斯奧、拿祖費南迪斯等未好番，主帥施丹真係牙痛咁聲。雖然皇馬排緊榜首，但老實講表現麻麻，好似上仗聯賽領先CF格蘭納達3球之下，一度被對手追番兩粒，最終贏4比2，睇落冇乜霸氣。
馬略卡冷落久保建英
今季重返西甲嘅馬略卡，只能徘徊下游，主因係攻力唔掂，打咗8輪聯賽入得6粒，其中5仗食白果，而最矚目新星兼皇馬借將久保建英，今仗被視為「銀河艦隊」對呢位日本神童嘅睇辦戰，對佢嚟講都好重要，可以證明自己揀外借去馬略卡係冇錯，不過久保今季只曾2次正選披甲，今仗未必會擔正倒戈，面對強隊一定玩死守。況且皇馬今季4仗作客聯賽，3次開半場和，可見佢哋作客初段唔多入局，半場和值得再追。