今晚德甲壓軸戲演國家打吡，拜仁慕尼黑主場迎戰多蒙特，兩軍今季表現同成績都唔理想，多蒙特近6場聯賽只贏兩場，拜仁更喺上輪慘敗搞到教練尼高高華飯碗都冇埋，今仗雙方都唔齊人，同樣有好多不穩定因素，黑柴建議小敲有4.5倍好分頭嘅和波。
（Now 671、Fox +、有線652及612台周日凌晨1時30分直播）
拜仁上輪不敵法蘭克福後，改由助教漢斯弗利克擔任看守教練，球隊高層尋日企出嚟否認搵雲格做新帥傳言，據報眾巨頭已有共識，只要今仗唔輸畀多蒙特，弗利克就可以扶正，起碼教到季尾再算。拜仁喺弗利克領軍下，啱啱喺歐聯擊退奧林比亞高斯，提早兩輪獲16強淘汰賽資格，球隊精神面貌有起色，但進攻組織只係一般，遇弱旅贏波過程都毫不輕鬆，今仗3名中堅歷卡斯蘇尼、盧卡斯靴南迪斯同謝路美保定兩傷一停，着晒火嘅箭頭羅拔利雲度夫斯基據報亦鼠蹊有傷，踢完今仗會做小手術，前線火力存陰影。
多蒙特早前狀態反覆，近期終有起色，上輪德甲下半場發力數禾夫斯堡3蛋，跟住歐聯鬥國際米蘭嘅非勝不可關鍵戰，喺半場落後兩粒嘅劣勢下連追3球反勝，出線形勢變番大好，狀態同氣勢在拜仁之上，只係前線兩大攻擊重心馬高列奧斯同查頓辛祖近期都負傷，今晚上陣機會唔太樂觀，想喺安聯球場全取3分難度甚高，既然雙方各有隱憂，不如小敲好分頭嘅和波，以輕鬆心情睇波好過。