H組榜首大戰，車路士主場迎戰阿積士。車仔上輪雖然作客擊敗阿積士全取3分，不過佢哋今季主場發揮冇作客咁好，而且佢哋依家對賽成績好過阿積士，今場和波冇蝕底，主場讓半一唔值博；車仔近6場主場只試過1次半場領先，踢法慢熱，轉捧半場和更明智。
（Now 644、有線602及662台周三凌晨4時直播）
車仔目前喺H組與阿積士3戰同得6分，基於車仔上輪作客1比0擊敗阿積士，換句話講，車仔只要今場唔輸，一旦最終同分計對賽成績，車仔肯定可以壓過阿積士，形勢上和波冇壞。車仔自從喺英超揭幕戰輸畀曼聯0比4後，作客已喺各項賽事累積7連勝，追平咗球會最佳紀錄，相反佢哋今季喺主場卻經常失準，除咗歐聯分組賽首戰輸畀華倫西亞0比1，上周中喺英聯盃16強亦畀曼聯踢出局，睇番佢哋對上6場主場比賽，只係喺英聯盃對乙組仔甘士比試過半場領先，其餘5戰上半場只得3和2負，入局慢難搶先機。
阿積士10場作客未輸過
阿積士上輪分組賽雖喺主場全失3分，但表現唔算太曳，佢哋近2場聯賽先後輕勝飛燕諾及施禾利，球員寓賽於操，可以專心應付今場榜首大戰，而且阿積士今季喺各項正式賽事10場作客未輸過，唔排除佢哋有機會喺主場偏弱嘅車仔身上搶分成功。既然今場勝負難料，不如轉敲半場和，車仔頭3場歐聯分組賽全開半場和，有迹可尋值得再追。