今晚意甲尾場上演都靈打吡，「1哥」祖雲達斯作客同市死敵拖連奴。雖然祖記啱啱度過122周年「牛一」，但佢哋往往入局慢，而且拖連奴主場出擊堅硬淨，初段隨時處於膠着，半場和值得追多鋪。
（my TV Gold 301、Now 638、有線654及614台周日凌晨3時45分直播）
尋日（11月1日）係祖記創會122年周年紀念日，仲養緊傷嘅隊長基亞連尼豪言，要連贏10季聯賽冠軍兼捧歐聯，不過呢支已連續8季喺國內封王嘅班霸，今季加入不少新兵，整體默契仍有待提升，而且過於自信，初段總係有啲輕敵。好以剛周中聯賽快車主場迎戰熱拿亞險勝2比1，都要去到補時先絕殺對手，前仗作客被弱旅萊切逼和1比1，總計近8場聯賽取得6勝2和，其中5場勝仗均只係贏1粒，對於一支有C朗壓陣嘅勁旅嚟講，咁嘅表現真係唔合格。
拖連奴主場夠硬淨
拖連奴整體質素雖唔及祖記，但主場出擊戰力有一定保證，近3場聯賽主場未輸過之餘，當中更曾賽和另一勁旅拿玻里0比0，今場遇上牌面及實力更強嘅同市死敵，預計會踢得更保守。何況祖記例牌慢熱，近8場聯賽有7次開半場和，若計埋歐聯，近11仗有8次開半場和，嚟緊周中又有歐聯作客莫斯科火車頭嘅後顧之憂，今仗或有所保留，初段未必咬得入硬淨兼有地利嘅拖連奴，半場和不妨再追。