青春風暴 Vs 遇強愈強
周六英超頭場上演倫敦打吡，車路士主場鬥水晶宮。車仔青春風暴席捲英超，多波入、進攻有活力已經成為藍戰士最新招牌，不過遇強愈強水晶宮都唔可以睇少，佢哋不嬲唔介意同Big 6對手鬥攻，對住同城勁敵更加唔會留手，中位數2.5球入球大值博。
（Now 621周六晚8時30分直播）
今季行青春路線嘅車仔，雖然季初發揮未如理想，交咗唔少學費，好彩主帥林柏特並冇因此動搖，畀足一班小將機會發揮自己，令佢哋成為帶領車仔聯賽回勇嘅主人翁。車仔近7場聯賽只係以1比2輸過畀「1哥」利物浦，更乘聯賽5連勝之勢升上積分榜第4位。周中歐聯對阿積士，仲喺一度落後1比4嘅劣勢下，連追3球逼和對手4比4，盡顯頑强鬥心。
車仔陣中最搶鏡嘅肯定係箭頭人物譚美阿巴謙，呢位22歲前鋒聯賽至今已有9球進帳。「美國隊長」基斯甸普列錫近期亦迅速上位，近2場聯賽個人斬獲4球，一班前場攻擊手弗到漏油，令車路士暫以25球成為聯賽入波第3多球隊。只可惜後防甩漏情況仍未見改善，計埋周中歐聯失4球，近4場聯賽都只有1場保持清白身，相信呢仗主場出擊，車仔都會繼續以攻代守。
客軍遇Big 6例駁火
水晶宮暫以11戰得15分排第9，戰績絕對唔失禮，尤其水晶宮不嬲遇強愈強，作客Big 6球隊屢有佳作，包括上季以3比2擊敗最終王者曼城，今季面對曼聯同阿仙奴亦取得1勝1和，總計近7次聯賽作客與Big 6交鋒獲3勝1和3負，其中6次開3球或以上，呢次作客史丹福橋絕對不落下風，中位數2.5球入球大值得捧場。