前線王牌輪流傷
歐聯F組爆發第4輪生死大戰，多蒙特返主場再撼國際米蘭。雙方現時同得4分，為出線席位爭崩頭，但多蒙特自王牌射手柏高艾卡沙受傷後，火力大減，今仗好可能連另一前線領袖馬高列奧斯都要養傷，國米客場出擊亦穩陣至上，捧2.5球入球細。
（Now 630、633、有線603及604台周三凌晨4時直播）
頭2輪已取得4分嘅多蒙特，上輪作客以0比2不敵國際米蘭，被對方追至同分之餘，更因對賽成績較差，為出線不容再失。可惜多蒙特近期確實火力下降，主因是射手柏高艾卡沙自9月尾因傷缺陣後，球隊近5場只入6球，其中兩場食白果，上場聯賽搵馬高列奧斯串演中鋒，但只係踢咗28分鐘就傷出，據軍醫估計今場趕得切上陣嘅機會唔太樂觀。單計今屆3場歐聯，「蜜蜂兵團」僅入2球，全開2球或以下，攻力疲弱。
國際米蘭作客保守
國米現落後榜首巴塞3分，由於上輪碰頭贏波搶到先機，假如今輪保持不敗，意味着倘若兩軍最終同分的話，國米可憑較佳對賽壓過對手晉級。主帥干地一向重視防守，而且喺意甲腳風甚順嘅盧卡古，於今屆歐聯仍未開齋，作客難免踢得穩打穩紮，加上國米近7場歐聯只入6球，其中6場開2球或以下，2.5球細盤穩開。
巴塞夠炒斯拉維亞
較早時間開波嘅同組賽事，巴塞隆拿主場迎戰布拉格斯拉維亞。巴塞隊長美斯自9月再度傷愈復出後，7次有披甲賽事均交出入波或助攻，逐漸上力，為盡快鎖定出線資格必搶攻。相反，布拉格斯拉維亞只得1和2負，明顯未夠班，何況巴塞於主場出擊特醒，近9次喺魯營球場出戰歐聯，豪取8勝1和，其中6次至少贏3球，加上啱啱聯賽輸畀利雲特谷埋一肚火，實搵斯拉維亞出氣，巴塞讓球半、兩球照捧上盤。