當家射手德盃抖夠
周六晚德甲重頭戲，法蘭克福主場迎戰班霸拜仁慕尼黑，兩軍剛於周中德國盃同樣作客小勝，同時都玩輪換畀主力休息，拜仁王牌射手羅拔利雲度夫斯基今季首度唔使擔正，到下半場落後至後備落場，至於法蘭克福頭號前鋒柏辛斯亞更休息到完場前至入替輕抒腳頭，擺明留力等今場駁火，黑柴預計會係入球騷，捧中位數3.5球大盤。
（Now 670、FOX+、有線651及611台周六晚10時30分直播）
利雲基拿比入波保證
拜仁目前以1分落後於慕遜加柏排次席，近兩場比賽包括德甲對柏林聯同德盃對波琴都只能小勝，而且輪換下表現唔理想，教練尼高高華面臨沉重壓力，今仗遇舊主絕對係志在必得，好在尼高高華對法蘭克福有深入了解，上季由法福過檔拜仁後，3度倒戈全大勝合共轟入13球。拜仁最大籌碼係兩位弗爆神鋒，羅拔利雲度夫斯基今季3線作戰頭13仗場場入波，至今共轟入19球，直至剛周中抖咗上半場至斷纜，至於翼鋒基拿比亦大熟大勇，上月6場正式比賽共入6球，有佢兩個在陣絕對係入波保證，不過拜仁近期有前冇後，陣中首次席中堅歷卡斯蘇尼同盧卡斯靴南迪斯齊齊重創要長抖，搞到近7仗正式賽事場場失波，防線堅唔穩陣。
法福近5輪最少入兩球
法蘭克福上輪喺對攻大戰作客以2比4不敵「一哥」慕遜加柏，表現依然獲好評，自奧地利教頭許達領軍後，呢班波踢法比尼高高華時代更開放，雖然同樣要3線作戰，但今季9輪聯賽場場入波，近5輪更每場最少攻入兩球，剛周中德盃畀多名主力輪休下，荷蘭箭頭巴斯杜斯挺身而出梅開二度贏波，今晚佢會同抖夠嘅杜辛斯亞合拍雙箭頭，球隊今季德甲主場成績又排第1，當然有足夠信心同拜仁駁火。